香港嘅女大班唔多，星展銀行總裁葉約德（Amy）就係其中一個。Amy尋日出席一個保健產品活動時話，自己以前好招積，以為有咩未見過，點會失眠，點知最近受到雷曼迷債同金融海嘯嘅夾攻，壓力大到令佢無覺好瞓。
傾起偈嚟都好親切嘅Amy話，喺佢失眠嘅日子，好彩食咗靈芝保健產品，終於唔使眼光光，無論幾煩都瞓得好好，媽媽患末期肝癌時，都係靠食靈芝食品令佢臨終時唔使受太多苦。
Amy曾經出任金融管理局儲備管理部助理總裁一職達十年，掌管外匯基金，九八年亞洲金融風暴仲有份打大鱷。問到佢點睇行政總裁任志剛卸任，健談嘅Amy只係話「好miss Joseph」（好懷念任志剛），其他就「no comment」（不予置評）嘞，至於有無諗過返金管局做，Amy就即刻話「唔會」。
見到金管局前掌櫃，梗係要問投資心得。Amy話個市雖然升緊，不過依然反覆，所以唔鼓勵短炒，叫大家小心入市，睇清楚間公司，買派高息嘅股票等收息，大家不妨參考下。