高官退休後揸起鑊鏟者大有人在，繼前警隊一哥李明逵開班教煮餸後，前經濟發展及勞工局局長葉澍堃（Stephen）亦拜師「阿一鮑魚」楊貫一學煮鮑魚，係人都知鮑魚出名難煮，Stephen落足心機鑽研，連一哥都讚佢用心又有天分。
一哥尋日出席一個活動，講起收前高官為徒，佢話Stephen煮餸有一手，絕對唔係玩玩吓，既然徒弟有心學，師傅都唔吝嗇，盡將烹調秘技一一傳授。一哥當年學煮鮑魚時交過唔少學費，為求摸出竅門，不惜工本買大批鮑魚練習，花費足夠買一層樓，如今輪到Stephen學嘢，唔知條鮑魚數會由邊個出呢？
聽聞Stephen煮鮑魚煮上癮，仲貪心到想學埋其他菜式，不過就仲未就到時間上堂，但Stephen拍心口話，日後有慈善節目需要佢幫拖，好想拉埋一哥齊齊上陣煮鮑魚獻技。
講番一哥近況，佢話七月中會去意大利接受意大利總統頒獎，事關意大利嘅世界御廚協會從世界各國三十位御廚中選出佢做「御廚中的御廚」，係亞洲首位華人獲此殊榮，心情好興奮。