澳門行政長官管理委員會日前公布，前社會文化司司長崔世安係下屆特首選舉唯一候選人。一向睇好崔世安嘅賭王何鴻燊近日落力為對方造勢，燊哥尋日出席一個公開活動時仲以「暫時都睇唔到有乜需要改善」力挺他表現好，仲呼籲社會畀個機會崔世安添。
查實燊哥早喺本年三月已經話過，澳門特首要由札根幾代嘅澳門人出任，佢仲話除咗崔家之外都諗唔到第二個有咁嘅條件。燊哥早就tip中崔世安係下屆特首不二之選，依家崔世安做咗唯一嘅候選人，燊哥尋日被傳媒問到崔世安嘅表現時，就毫不吝嗇地送高帽畀對方戴。
燊哥笑言：「佢有咁多年管治經驗，一向都係咁勤力，幾乎喺電視（新聞）晚晚都見到佢。」當被問到崔世安有乜地方需要改善時，燊哥更落足嘴頭話：「你唔使教佢啦，咁有經驗嘅人，會兵來將擋！我暫時都睇唔到有乜需要改善。」臨走之前仲不忘呼籲各界「畀個機會佢」。