霍老同澳門嘅淵源好深，佢○二年退出澳門旅遊娛樂公司，將手上市值一百億元嘅兩成七澳娛股權捐出，成立澳門霍英東基金會建設澳門，基金會支持興建嘅鏡湖醫院專科醫療大樓尋日舉行落成儀式，澳門特首、霍老相識半世紀嘅賭王同國家衞生部高官都有出席。

霍震霆表明，霍家撐澳門嘅心不變，霍家唔會離開澳門，基金會日後繼續建設澳門醫療、教育同文化。燊哥就大讚霍老，話醫療大樓以霍老命名，猶如霍老手執船槳，默默推動澳門專科醫療服務向前行。

喺尋日嘅儀式中，霍震霆同二房嘅文遜等幾位霍家二代成員亮相，不過，第三代就只有啟山。霍家第三代中，啟剛高調接手拓展爺爺喺南沙教育產業，最近進身香港青聯副主席，似乎有意承接爺爺嘅政治資產。啟山則一向低調，今次跟住爸爸過濠江亮相，唔通啟山對澳門社會服務特別有興趣？