田少同方剛兩啤夫婦，年年暑假都一齊旅行，方剛趁早排立法會無大事件，於是同田少結伴遊一轉地中海，佢哋十三日夜機飛去威尼斯上船，廿一日喺羅馬落船，田少兩公婆喺羅馬玩兩日，而方剛因為第二朝要出席立法會食環事務委員會特別會議，討論食物營養標籤制度，因而提早飛返香港。

田少、方剛坐嘅郵輪叫Crystal Serenity（水晶尚寧號），來頭唔細，被譽為全球最佳中型郵輪，船上享樂設施一流，但係，田少一上船，就留意到隻船本來坐到八百幾人，依家船上得五百人左右，即係唔夠七成客滿，無往年咁擠迫，歐洲旅遊業睇怕仲未復甦喎。

豬流感爆發 港旅業嚴峻

落咗船後嘅歐洲大陸零售業又點呢？田少曾經講過，喺經濟不景下，Cash is King，佢今次去散心，本來一心諗住享受美食同沿途風光，點知都忍唔住手，喺意大利時裝名店留低唔少Cash。佢話，歐洲本來七月五日先至開始減價，但係旅業不振，佢發現當地名店有偷步減價吸客嘅情況，佢入到名店，對住件衫呻句價錢太貴，店員就會自動投降，靜雞雞打個靚折頭畀佢。名店都有價講，市道係點可想而知。

田少話，問過歐洲嘅朋友，當地旅客跌成三、四成，相當恐怖，喺咁嘅大環境下，香港旅遊業好難獨善其身，加上五月豬流感爆發時，內地旅客怕喺香港被隔離，截至六月二十日，內地訪港旅客下跌一成三，田少對今年香港旅遊業業績發預警，今年將會係香港近年最嚴峻嘅一年。