金融海嘯捲走港人身家，「馬照跑」嘅神話亦破滅。馬會主席陳祖澤（John）尋日初步為馬季「埋數」，發現今年盈利大幅減少廿五億元，數字跌得驚人。John喺風雨飄搖之中擔任「大當家」，「跑數」壓力唔輕。主席勞心勞力，主席夫人透露，John大有可能做埋呢一任主席就退位讓賢。
並未有為去留露口風
連場暴雨落唔停，但無損馬迷搏殺心情，尋日沙田馬場舉行「賽馬會社群日」，城中名人冒雨撐場。卓妮第一時間捉住主席，問吓申請增加五天賽事幾時「開綠燈」，佢話仲等緊政府拍板，時間表未定，但有信心爭取成功喎。卓妮轉轉話題，叫佢總結一下今季個人投注成績，佢笑言係交學費居多，未見贏大錢。唔少馬迷以為John近水樓台，一定聽埋唔少必勝貼士，身邊嘅陳太就爆料話，老公緊守小注怡情原則，最叻嗰次都係贏過幾百蚊咋。
馬季煞科在即，John話暑期要抖一抖，正諗緊去邊度「小休」一下。唔經唔覺，佢坐咗主席寶座快將四年，按照慣例，做埋新馬季後明年就要「落莊」，John未有為去留問題露半點口風，但陳太就話，老公退下火線一啲都唔奇，屆時可以陪佢多啲喎。
陳振彬愛駒三甲不入
卓妮轉頭見到觀塘區議會主席陳振彬入場，為愛駒「傳奇快車」打氣，Bunny帶埋太太及兩位小公子亮相，聲勢夠晒大，可惜馬仔三甲不入。Bunny話，自己天性愛水、日日游水，偏偏馬仔唔熟水性，撞啱尋日跑爛地，認真嘥料喎。
同場仲有全國政協委員張華峰，佢一向係馬場稀客，原因係早幾年一直抽唔到新馬，好少入場，直至去年成為馬主，入場興趣大增，尋日愛駒「創新高」出戰，專登帶埋太太及大女張潔瑜入場做啦啦隊。佢仲介紹囡囡畀卓妮識，千金生得亭亭玉立，正喺英國讀高中喎。
卓妮