旺角除咗潛在鏹水彈危機之外，其實仲有一樣嘢相當牙煙，就係墮物陷阱多到冇朋友。高空墮物唔一定係壞蛋蓄意挑釁警方，有時候，頭殼頂突如其來會飛來橫禍。好似六月十一日咁吖，奶路臣街有個重十磅嘅喇叭箱跌落街，啱啱遇着剛剛，砸中一名正從大廈步出嘅男子。砰嘭一嘢，昏迷不醒，嗰個無辜辜嘅路人甲，咁就無啦啦瞓入醫院。

條街點解會失驚無神跌個喇叭箱落嚟？呢個係香港特色，亦係街頭文化，香港人做生意好得意嘅，鍾意擘大喉嚨高呼狂嗌：「埋嚟睇！埋嚟揀！唔買都揀揀！唔揀都玩玩！」嗌得多傷身吖嘛，所以就改變策略嘞，喺舖頭外牆安裝喇叭，有時係現場直播，有時係錄音轉播。

好嘞，做生意梗係有賺有蝕有轉型㗎啦，舖頭開完又執、執完又開，老闆換完一個又一個，到頭來，外牆上面嘅喇叭都唔知屬於邊個嘅。久而久之，風吹雨打，鐵銹木霉，搖搖欲墜，廢置喇叭就危危乎成為高空墮物嘅暗器，靜靜等待行衰運行到頭殼頂嘅受害者。

除咗喇叭，仲有射燈；除咗射燈，仲有招牌；除咗招牌，仲有僭建。總而言之，求求其其是是但但其中一件跌落街，都足以造成傷亡慘劇。呢嗱嗱嗱，舊年六月二十八日之嘛，灣仔道一間泰國菜館嘅三百磅木製招牌玩跳樓，一名女途人就咁砸死咗。

旺角又有另一個街頭文化，就係射燈長開。講得好聽就係光芒四射嘅東方之珠，講得難聽咯喎，長開射燈係粗暴野蠻製造光污染。最慘就係屋企外牆安裝咗射燈嘅街坊，黑夜恍如白晝，瞓得着至出奇。

即係咁，大大小小嘅墮物陷阱除咗有危險將你砸扁，仲係非常唔環保嘅，一來浪費電力，二來令人失眠。既然係咁，政府點解唔做嘢？官僚點解唔規管？

唔講真係唔知，原來現行法例有灰色地帶，射燈同埋喇叭只係額外裝置，唔屬於建築工程，所以唔受《建築物條例》監管，屋宇署係唔會負責清拆嘅。射燈嘅光污染問題又點算呢？對唔住，《建築物條例》固之然管唔到，連《環保法例》都吹佢唔脹。反正都係束手無策，官僚索性懶懶閒閒，完全懶得諗辦法消滅數以萬計嘅墮物陷阱。

計功夫茶話齋，曾蔭權呢鋪真係失策嘞。煲呔曾早前透過經濟機遇委員會度咗一條奇謀妙計，話要「拆招牌、創就業」喎，聘請人手清拆幾千個日久失修嘅爛招牌，經濟就可以復甦咁講。如果曾蔭權夠醒，一於食住上，提出「拆喇叭、保飯碗」，同埋「消滅光污染，保護小市民」，民望想插水都難咯！