香港唯一一間戒毒學校正生書院一直希望搬入梅窩，但社會對此關注唔多，直至近來頻頻爆出校園濫藥事件，大家先紛紛企出嚟話撐正生，各大政黨亦睇準時機高調踩入位於芝麻灣嘅正生校舍幫拖。立法會教育事務委員會原定七月初會去正生探訪兼實地考察，不過考察團已經正式宣布「冚旗」，點解？因為個個政黨都已經搶閘去咗，所以再搞類似嘅訪問都冇乜意思。
各大政黨喺正生事件上搶住做嘢爭功，先有白鴿黨拉隊入芝麻灣進行實地考察，上星期日嘅《城市論壇》移師正生校園舉行，公文袋陳淑莊同自由黨新星方國珊都有入去撐場兼爭取曝光，之後自由黨雖然反應有啲慢，但上星期五都喺銅鑼灣街頭搞心意簽名行動支持正生遷校，結果搞到立法會正規嘅探訪無奈取消。
正生嘅搬遷訴求已經提出咗好耐，書院同梅窩居民嘅爭拗亦由年初開始，不過一班立法會議員除咗教育界代表張文光喺年初向社署同教育局提出正生遷校嘅問題外，其他政界中人根本冇乜關注呢個議題，所以真係唔知讚佢哋反應快好定還是鬧佢哋事後趁高興好喇。