尋日肥仔明同英姐都分別喺立法會走廊就各種各樣嘅問題作回應，英姐回應完警隊遊行，肥仔明不知幾畀面，忽然拍手大讚佢講得好。英姐雖然一副無佢咁好氣咁話唔好理佢，但講多兩句，都忍唔住讚佢着恤衫打呔「好鬼靚仔」，肥仔明不知幾高興。肥仔明話，本來諗住着件正生書院Ｔ恤嚟開會，點知尋晚知道要做代主席，拿拿臨拎番條太太買嘅呔出嚟，着得莊重啲坐上主席位。

講番近期最興嘅競猜誰是新特首辦主任嘅音樂椅遊戲，肥仔明就話同近期大熱嘅政制及內地事務局副局長譚志源廿年前已相識，當時譚喺觀塘做助理民政專員，覺得佢係大蠱惑，喺政治嚟講即係「長袖善舞、八面玲瓏」嘅意思，不知幾正面，不過就擔心佢太嫩，唔知喺處理例如雷曼事件呢啲棘手議題時夠唔夠能力。唔緊要喇，反正現任嘅特首辦主任，能力都唔見得好高！