尋日天氣悶熱到飛起，卓妮一心貢入馬場涼吓冷氣，迎面見到平日西裝骨骨嘅John及馬會大董葉澍堃雙雙放下拘束，唔打呔入場，莫非係馬場便服日？非也！原來係冇盃賽要頒獎，大家打扮都可以輕鬆啲喎。

John又主動報喜，話佢嗰匹正在坐「防疫監」嘅新馬已經有「朵」，英文名叫做「How Wonderful」，照字面意思翻譯，中文名應該叫做「真係奇妙」，但John靈機一觸將佢拆成四個音，即係「How--Won--der--ful」（好運得福），貪佢意頭好。改個靚名係咪真係好運啲，新馬季就見真章。

海嘯價住北京會所

卓妮轉頭喺會員棚內巡視吓，發現馬會亦加入旅遊割喉戰，推出「三日二夜北京旅遊套票」，連來回機票、兩晚北京會所住宿及每日豐富早餐在內，價錢只係港幣三千三百九十九蚊，卓妮記得住宿北京會所一向收開千幾蚊人仔一晚，依然來個大平賣，莫非金融海嘯嘅威力真係咁大？

卓妮