平時最講紀律嘅紀律部隊，因乜解究忽然冇晒紀律玩反叛？哦，原來佢哋見到問責高官帶頭自動減薪，覺得好唔順氣，所以一怒上街，要求政府盡快落實去年完成嘅職系架構檢討報告書嘅建議，為紀律部隊人員職系增加增薪點。簡單咁講，紀律部隊唔想跟大隊減薪，反而希望加薪，佢哋好不滿咁話「減就快、加就慢」。

講到呢度，功夫茶有必要表明立場。今時今日咁嘅時勢，公務員減薪係應該嘅。全世界家陣只有兩種人，第一種，已經失業；第二種，恐懼失業。經濟差成咁，公務員梗係要同市民共度時艱㗎啦！

好嘞，立場表完，睇番紀律部隊遊行。呢班另類示威者值唔值得支持呢？不如咁講啦，如果政府答應佢哋嘅加薪要求，相信會有更多人上街示威，抗議公務員撳住搶。

咦喂喂喂，其實唔止上述紀律部隊上街喎，一個星期之後將會輪到警務人員示威。師兄師姐嘅訴求有少少唔同，係要求為警隊設置獨立薪酬架構。不過，警隊示威嘅基本精神同其他紀律部隊冇乜太大分別，又係唔想減薪，又係希望加薪。

唉，姑勿論紀律部隊人員嘅訴求合唔合理，功夫茶淨係知道一件事，回歸十二年嘞，特區政府嘅管治威信愈來愈弱雞，最後淪落到連警隊都唔聽話。自從一九七七年廉政風暴以來，警隊三十二年從來未試過籠裏雞作反，如果唔係政府太無能，點會搞到咁失控？喂，呢班哥哥姐姐揸槍㗎，今次就話玩沉默搞對抗，唔嗌口號啫，下次有冇人擔保唔會好似澳門抽水哥咁向天開槍？

政制及內地事務局局長林瑞麟尋日被記者問到紀律部隊遊行會否打擊政府威信，呢位局長大人軟弱無力講咗一句廢話，佢話喎：作為公務員應該共度時艱。

計功夫茶話齋，共度時艱梗係要啦，如果政府夠強勢，遊行場面根本就唔會出現，局長完全冇必要尷尷尬尬被問到口啞啞。你試下畀功夫茶做局長吖，公務員莫講話冇得遊行，連諗下逆市加薪都有罪！

即係咁，紀律部隊包括警務人員嘅示威訴求係冇可能得到民意支持嘅，政府咁都唔識得因勢利導，將不合理期望消滅於萌芽狀態，證明呢個管治班子好有問題，簡直係低能嗰隻。

呢次弊傢伙咯，槍桿子掉轉槍頭，求神拜佛唔好擦槍走火！