堂堂財爺，又係劍擊高手，老朽都唔抵得你畀班尊貴議員奚落，你縱然否認了閃縮，卻難辭鬼祟之嫌，明明可以擺出大師風範揀選金管局總裁，你卻搞條尾巴出來畀人亂扯，認真不該！家陣選金管局總裁唔係選「特區密探」或「財經界二五仔」，何不大大方方話「係佢喇，踏遍千山，涉過萬水，始終你最好！我揀佢，就係咁簡單！」

高手過招，從來不需要謾罵，此孫子所謂「不戰而屈人之兵」也！佢又話：「故明君賢將，所以動而勝人，成功出於眾者，先知也。先知者，不可取於鬼神，不可象於事，不可驗於度，必取於人，知敵之情者也。」鬍鬚曾若然一早明白「唯物觀念」的重要，派糖就唔會派到一片民怨！講開又講，你同煲呔曾都算係高人，明明一百幾十億嘅「糖」，可以派到令人感覺冇糖嘅存在，尋且有啲酸味，道行已臻深不可測之地步矣！

鬍鬚曾對中國文化叻唔過啲細路哥，否則佢應該知道京劇武行中，最大的動作是翻觔斗，但關公不能翻觔斗，他是儒雅的。你看關公的像，沒有瞪着眼睛拿刀亂砍的，他多半臉紅紅的在讀《春秋》。高手追求的是一種儒雅的境界，已故日本演員勝新太郎的《盲俠座頭市》，盲俠雙耳一郁，電光火石間，一個凌波急轉身，未見拔劍而劍已入鞘，一地衰人橫屍於黃葉紛飛飄落之際，盲俠頭也不回繼續除奸殺惡去矣！型爆！鬍鬚曾，大家都是學劍的，你怎麼只學得「閃縮」兩字！

講真，你靚仔過曹達華，佢應該矮過你，肚腩大過你；但係當東海漁歌響起，于素秋就會含情脈脈出現，你得個縮，鬼睬你！