立法會轄下嘅議會聯絡小組計劃喺嚟緊暑假出訪東歐三國十一日，每名議員團費估計最少五、六萬銀。為免六十名議員爭崩頭，內會早前通過以比例代表制嘅方式，按各黨派同獨立議員嘅人數比例，瓜分嗰八個由公帑資助嘅免費歐遊名額。
根據有關分配方法，聯絡小組嘅正副主席專業會議石禮謙同民主黨劉慧卿，其中一位可以免費報團，另一位如果都想跟埋一齊去，一係就自掏腰包支付團費，一係就要同自己嘅黨友爭奪餘下嘅免費名額。換言之大舊石同劉慧卿，肯定有一位需要自費。
最後身家相對豐厚啲嘅大舊石展現出紳士風度，自願讓出個免費名額畀劉慧卿，自己改以自費方式報團，劉慧卿因為佢咁慷慨，就不必同黨友爭一個名額嘞，大舊石今次真係功德無量，令事件可以和氣收場。至於其餘嗰七個免費名額亦順利選出。