孫公大女出世嗰日，咁啱撞正香港史上造成最嚴重傷亡嘅六一八水災。孫公憶述：「佢出世嗰朝都未落雨，到雨最大嘅時候先出世。」佢當年親自駕車，載住自己嘅父母同外父、外母去醫院迎接新生命，但途中一個車胎漏氣，佢惟有換完胎先趕去醫院，一行人睇完ＢＢ之後坐孫公部車返屋企。

點知啱啱換好嘅車胎竟然行行吓成個轆飛咗出嚟，即係甩咗轆！孫公笑言：「好彩當時雨好大，我開得慢先冇事！我仲落車執番個轆添！」孫公載住一車老人家，大雨之下飛轆竟然個個都毫髮未傷，認真好彩。

孫公尋日自嘲冇記性，不過佢話六月二十四日呢個大日子就點都唔會唔記得，因為呢日係佢嘅結婚紀念日，後日係佢同太太四十周年結婚紀念。佢好抵死咁話：「有啲事係要好有記性，唔係好易引起嚴重家庭糾紛。」佢尋日仲借花敬佛，點咗John Denver嘅《Perhaps Love》送畀太太，十足廿四孝老公。