金融海嘯危機近月稍稍平息，市場投資氣氛又轉趨熱鬧，其實投資除咗講運數外，亦要做足功課。英皇集團主席楊受成日前現身廣東金融學院，以學術講座演講嘉賓身份，就「金融海嘯對全球的影響」為議題分享心得，演講內容極具前瞻性，佢送咗兩個字畀現場聽眾，就係「審慎」。
楊受成北上廣州開金口，吸引該校一眾教職員及學生出席。佢先從分析金融危機成因入手，講吓去年十月刮起嘅呢場金融海嘯對各國市場經濟及金融產品嘅影響，最後當然講到內地投資者如何面對呢次嚴峻嘅經濟危機。楊受成話，一定要審慎，即係千祈唔好對海嘯掉以輕心。
楊受成話，對於獲邀出席呢次講座感到好榮幸，事關金融海嘯係百年難遇，影響深遠，佢想趁住今次機會利用自己喺商界累積多年嘅經驗，同內地嘅新一代交流心得。
其實楊受成去年已獲邀為該學院嘅名譽教授，為加強雙方聯繫，楊受成話，嚟緊仲打算定期派出旗下英皇金融證券集團嘅金融專家到該學院講學，希望這群在學精英緊貼香港及內地金融財經嘅發展步伐。廣東金融學院院長劉莊感謝楊受成分享寶貴經驗，仲話期望日後共同舉行更多研討會，加強中港兩地學術交流。