副學士轟搶飯碗

喺金融海嘯同豬流感雙重打擊下，就算係擁有豐富經驗同技能嘅現職打工仔，一旦失咗業都好難搵得番份工，更何況係啲毫無工作經驗嘅大學畢業生？為免呢批後生仔喺嚟緊暑假一次過湧入勞動市場，進一步推高整體失業率，港府早前就懶有創意咁推出大學生實習計劃，同企業以五五分帳嘅方式，用每月四千蚊人工聘請啲畢業生做實習，令佢哋喺統計學上唔會被當做失業。

然而有關計劃仲未正式開始推出，已經滋生咗種種問題同反效果，包括畀藉口啲無良僱主向大學生壓價，以及令啲中五、中七同副學士畢業生更難搵到工，反而助長咗社會嘅減薪裁員潮。前日就有批副學士學生搞咗個「失業禮」，炮轟實習計劃搶走晒原本屬於佢哋嘅飯碗，令佢哋畢業即失業。

喺九五至○○年出任教籌局局長嘅平叔，尋日主持一個電視清談節目時，就踢爆佢當年推出嘅展翅同青少年就業見習計劃，亦係由政府資助二千蚊，資助啲企業用四千蚊嚟請啲搵唔到工嘅中學生，同依家嘅大學生實習計劃好似「倒模」咁。

最令人感慨萬千嘅係，煲呔曾今時今日照抄十年前嘅做法，條數計起上嚟比當年刻薄好多，當年中三畢業都搵到四千蚊，家吓津貼嘅對象係大學畢業生，比中三嘅讀多七年書，又係搵四千，唔怪得十年前特區政府推出展翅同青見計劃時，批評嘅意見唔多，今次畀大學生嘅計劃，一推出就劣評如潮喇。就算照抄，都要以人為本、計好條數至得㗎！