200樽都唔夠分

發叔家族尋日有馬出，發嬸首先領軍帶仔女入場，反而發叔就比較低調。卓妮問起子薑「銷情」如何，發嬸笑騎騎話「定單」多到應接不暇，二百樽子薑唔使幾日就派清光，雖然諗住見好就收，但正所謂盛情難卻，今日起又要開工，一於加碼炮製子薑，咁講法，全香港啲子薑豈不是就快畀發嬸掃晒？

發嬸話，子薑供應不成問題，反而用嚟裝薑嘅玻璃樽就極之缺貨，事關發嬸對玻璃樽都有一定要求，唔想搵啲太肉酸嘅玻璃樽，怕影響「發嬸牌子薑」嘅形象，所以早前已狂掃一批瓶身有精緻花紋嘅玻璃樽連子薑送贈好友，依家加碼再製薑，佢又要四出搜購玻璃樽嘞。

正當卓妮同發嬸傾子薑傾到興起，終於見到發叔現身，問佢點樣慰勞太太整愛心子薑，為佢廣結人緣，發叔一時間唔知點答好，或者諗住兩公婆唔計得咁多啩，但係發嬸即時撒嬌話：「起碼都送十卡鑽戒喇！」嘩，十卡鑽戒唔嘢少，但發叔見太太咁辛苦，明知畀佢揼心口都唔敢Say No。發嬸呢招用子薑換巨鑽，策略認真成功噃！

卓妮