本文重點
熱帶風暴「蓮花」掠港再加上夏至，尋日天氣悶熱到爆，一眾入馬場消遣嘅名人亦熱到一身大汗，唔多願行出冇乜冷氣嘅賞馬圈及賽道睇馬，不過講到有環保團體尋晚發起熄燈兩小時呼籲大家慳電，馬會大董葉澍堃及李國棟都話支持。
港大尋日喺沙田馬場搞咗個「港大校友會盃」，除港大校長徐立之外，成班港大名人舊生包括前商務及經濟發展局局長馬時亨、商務及經濟發展局常秘蔡瑩壁及浸大校董會主席王英偉亦紛紛撐場，馬會大董行列中，馬會主席陳祖澤（John）及葉澍堃（Stephen）都係「港大之友」。
李國棟扮鬼嚇人
卓妮問佢哋點睇熄燈行動，John話唔開燈仲好，可以同仔女點住蠟燭食飯慶祝父親節，夠晒浪漫。Stephen夠鬼馬，佢話預計返到屋企已經係夜晚十二點，啱啱夠鐘上床瞓覺，唔使開燈喎。大董李國棟都笑言熄燈後會開電筒照住自己，扮鬼嚇吓人，李太喺佢身邊，都聽到哈哈大笑。究竟佢哋有幾多誠意要慳電，佢哋自己至知嘞。
同場仲有王英偉，佢自爆夜晚約咗兩位公子共度父親節，佢介紹話，大仔喺美國修畢藝術，計劃返香港發展，細仔就喺大學讀經濟。咁啱西九行政總監個位懸空，何不叫公子試吓？王英偉笑騎騎話：「總監喎？邊有本事，你講笑咩？」
卓妮