之不過咁，如果你嘅慳家係建築於人哋嘅浪費之上，咁就唔啱嘞，你唔係英雄，你係狗熊。

消防處旺角救護站有一個非常奇怪嘅現象，裏面泊滿高官私家車，反而消防輕型貨車就被迫要泊去附近嘅收費停車場。即係話，高官利用公家資源免費泊車，而消防處就要焗住利用公帑額外為消防輕型貨車繳費泊車。

呢嗱嗱嗱，高官嘅心態好正確㗎，慳得一蚊得一蚊吖嘛，救護站有位畀佢哋泊車，梗係生霸死霸啦。問題係，高官嘅慳家係建築於浪費公帑之上喎，咁就死火嘞，呢啲叫做公器私用，又可以叫做以權謀私，慳家變咗羞家。

功夫茶有冇老屈㗎？消防高官係咪咁自私自利㗎？本報記者實地視察過，本月初連續觀察三日，旺角救護站高峰期泊咗九架私家車同埋兩架電單車，而三架消防輕型貨車的而且確泊喺毗鄰一座商業大廈嘅停車場七樓。記者查明，私家車車主全部係高官，包括副救護總長、高級助理救護總長、助理救護總長以及救護監督等等。記者更加查明，收費停車場月租一千六百蚊，以三架車計算，每月支付四千八百蚊，一年落嚟，五萬七千六百蚊公帑就咁付諸流水。

即係咁，如果救護站有足夠空間任泊唔嬲，功夫茶唔係太介意高官公器私用，之但係，地方明明唔夠使，有乜理由本末倒置，將私家車泊入去，將公家車趕出街？趕出街都算嘞，居然仲要浪費公帑畀租，呢班高官咪就係離譜囉！

以為淨係浪費公帑咁簡單咩？其實唔止㗎。原來救護站裏面係有一個入油站，專畀消防車或者救護車使用，明文規定車輛不准泊近入油站，以免妨礙入油。吖，整鬼佢吖，高官嘅私家車搞到空間買少見少，卒之入油站真係明顯受到妨礙。你知啦，消防處救護車好鬼死老爺㗎，平時係唔係都死火跪低，如果加上冇油，唔知又要延誤幾多次救援咯。

消防高官嘅做法，令功夫茶諗起成語「鵲巢鳩佔」。鳩到底係乜鳩呢？其實即係杜鵑，佢哋會將喜鵲嘅蛋鬼鬼祟祟逼出巢外，將自己嘅蛋偷偷放落去，覓食歸巢嘅喜鵲不虞有詐，傻更更幫杜鵑孵蛋，孵完先至知道搵笨。計功夫茶話齋，旺角救護站嗰班消防高官，應該改名叫做「消防鳩官」。

點都好啦，麻煩消防處嚴肅處理，查明真相，踢走鳩官，因為公帑同樣都要慳得一蚊得一蚊，納稅人嘅血汗錢唔可以胡亂浪費！