馬季七月一日煞科，馬迷同馬主係時候總結吓呢季賽果。馬會早前公布新一批馬主名單中，馬會主席陳祖澤（John）都榜上有名，原來佢已靜雞雞揀好匹新馬，近日更已運抵香港。有新寵到埗，理應帶出嚟見吓街坊，可惜馬仔正坐緊「防疫監」，連主人都無法見一面喎。
尋日晏晝一點幾，John獨自行經立法會門外，表情若有所思。傾談之下，原來係因為尋日周三罕有地冇夜馬跑，令佢冇得入馬場，鬼咁唔習慣。又難怪嘅，賽馬係John嘅事業亦係最大嗜好，佢話好希望政府盡快拍板加多五天賽馬日，咁就皆大歡喜嘞。
John近日添咗個「新寵」，由外國運咗匹馬返香港，新馬身價有幾高有待揭盅，不過新馬暫時未可以亮相住，皆因接受緊防疫檢查，連馬主都唔探得班。John話，會耐心等待兩個星期，咁就可以近距離摸吓「新寵」。至於改乜名好，佢話暫時未諗到。計落數，馬仔檢疫完後將近馬季水尾，睇怕今季都係出唔到賽，想知呢匹新馬有幾醒，要留待新馬季嘞。