豬流感疫情來勢洶洶，好多市民都撲定口罩過暑假，不過，「怪醫」梁家騮就一向係「大淡友」，覺得豬流感唔係咁大件事，早前仲批評政府用七億元公帑為二百五十萬人注射疫苗太浪費。話口未完，早前患過感冒嘅佢，尋日又中招，又流眼水又發燒，豬流感嘅病徵有晒，不過佢堅持唔睇醫生，照返立法會開會，搵其他五十九個議員條命仔較飛。
立法會「五散人」逢星期三食早餐，坐埋一齊交流議會事務，尋日保險界陳健波突然收到怪醫嘅電話短訊，話患上感冒嚟唔到，搞到一向注重衞生嘅陳健波囉囉攣，佢同記者呻，話唔知怪醫係咪有豬流感，驚住「五散人」被集體隔離，陳健波為人果然好保險。
陳健波嘅憂慮唔係無道理，怪醫下午戴住口罩返立法會開會，但喺發言時除低，任由病菌散播。記者問怪醫有冇做豬流感測試，佢反問「有癮咩」？又話如果中咗招，體內已經有抗體啦，唔使打針，佢亦冇睇醫生，翹起雙手，好寸咁話：「我照鏡時咪睇緊醫生囉！」身為醫學界代表，應該為防疫樹立模樣，怪醫帶頭輕視豬流感，似乎有啲唔應該喎！