眾所周知港府為免七一遊行有太多人上街，所以乜嘢重要議題都押後處理。咁啱今年七月放暑假前，只有七月八日一次立法會大會，所以唔少具爭議事項都積埋喺嗰日討論。

隨便數兩樣，已經有最低工資同埋欠薪刑事化嘅法例，逼埋喺七月八日首讀。勞工界議員當然呱呱嘈，想快啲立法啦，所以內務委員會要七月十日加班，畀議員討論成立相關嘅草案委員會，務求爭取最多時間開波做嘢。

除此之外，負責批錢嘅財務委員會又要加開七月三日、七日嘅會議，等政府可以批錢做四川重建，同埋新一輪紓困措施。

仲有梁展文事件嘅聆訊又未完場，下個月又嚟多幾場，包括下月尾三次傳召梁展文出席聆訊。加埋因應上星期有市民喺立法會自殘嘅事件，立法會行政管理委員會又要加開七月十六日嘅會，傾吓立法會大樓嘅保安措施。總之今個暑假，議員唔使執行李去旅行啦，執好公事包去開會啦！