不過個會尋日開張大吉，呢位榮譽會長臨時失場唔到，事實係立法會尋日開會撞晒期，但唔知能否反映個會喺佢心目中有幾重要呢？

喺會計界左右為難

上年十月立法會選舉，工聯會喺地區直選大捷，近年亦積極拓展專業界別，不斷成立新屬會，俗稱「金銀財寶」嘅金融、銀行、財務策劃同保險四個屬會，已經合共招攬咗七千幾個新會員。

工聯尋日又有新屬會開壇，尋日成立嘅香港會計業總工會依家係細會，不過難保第日唔會變成選舉票倉之一，阿Paul樂意埋堆，同棠哥一齊擔任榮譽會長，真係好識計數。

不過香港近年工運政治化，加上金融海嘯未退，勞僱關係緊張，萬一會計界爆發勞資糾紛，到時阿Paul企喺邊面？做得榮譽會長就要幫打工仔，不過，得失大老闆，喺功能組別選舉損失可能仲大。