行會成員劉皇發太座吳妹姝炮製嘅酸子薑早已喺政商界街知巷聞，每年初夏，佢例必整番一百幾十樽，唔止派街坊，仲派到去中環嘅立法會同政府總部，就連人稱「好打得」嘅發展局局長林鄭月娥都食過翻尋味，追問發嬸幾時有子薑食。尋日發嬸應「粉絲」要求加料秘製二百樽子薑，分咗幾十樽去立法會益吓班議員。不過佢講明，食薑都要講環保，大家食完子薑，記得「回樽」。
卓妮尋日喺立法會停車場見到一個盛大嘅場面，發叔嘅司機安哥用立法會嘅手推車，將成百樽子薑運送到立法會大樓，發嬸人唔到但薑到，佢提醒議員返屋企後要將子薑放喺雪櫃最少雪番兩日至食，味道更正，而且保存一年都唔會變壞。
花兩日製二百瓶
發嬸出品嘅子薑到底有乜秘方就唔方便講嘞，佢矜貴在有錢都買唔到，每年過咗端午後，發嬸就會出動搜羅合時靚子薑。日前佢柯打咗兩大擔子薑，搵齊屋企三個外傭開工，先刨後切片，再用糖及醋浸，花咗兩日時間製成咗二百樽。發嬸話，今年整薑數量比去年多，皆因發叔入埋行會，官場朋友多咗，為免順得哥情失嫂意，點都要人人有份。
玻璃樽回收再用
整薑難唔到發嬸，反而搵樽就考起佢，原來近年內地流行轉用膠樽，玻璃樽變得極渴市，為咗儲起玻璃樽，發嬸平時飲完咖啡亦會叫工人留起個樽備用，所以今年有幸收到「發嬸牌」子薑嘅人，記得幫幫手將個樽回番畀發嬸，咁就確保明年一定有薑食，又夠晒環保。
講起發叔畀正生書院事件煩到頭都痕埋，發嬸話深知老公好心煩，所以唔敢多口煩佢，默默喺度做子薑幫發叔廣結人緣，咁細心嘅老婆，你話去邊度搵呢？
卓妮