Raymond政務官出身，回歸後，曾經出任前特首嘅副私人秘書，即係喺特首辦做過，算係熟手技工，四十五歲嘅佢上年中轉任副局長，近期推銷在囚人士投票權諮詢報告，狀態神勇，如果佢真係有機會接替攞命陳，有職升之餘，亦無打爛金飯碗之憂，對佢個人嚟講，絕對係筍工，加上特首辦主任已經成為升官跳板，今次火速上位之後，日後仲有大把世界，肯定恨死其他副局長。

不過，特區官場論資排輩，Raymond脫離政務官行列前，係民政事務局副秘書長，最為人熟悉嘅履歷，係○二年出任前財爺梁錦松新聞秘書，點秤都始終係新進一名，如果佢有幸紮職，除咗可以理解為佢喺仕途三級跳，亦可視為特首辦主任一職自動降格，唔知煲呔曾點諗？

蔡瑩璧變煙幕？

林D9有機會執掌特首辦，已經傳咗好耐，消息話，佢仍未斷纜，係Raymond之外嘅另一人選，貪佢夠忠心，而林D9亦樂於借轉任特首辦主任轉型，有望日後喺官場更上一層樓，不過，呢個調動牽涉嘅考慮就大得多，因為要另外搵人頂替佢個局長位，要中央任命，而且，政改諮詢年底出台，臨陣易將，亦係一個重要考慮因素。消息稱，如果林D9真係「轉型」，騰出嘅政制及內地事務局局長職位，好有可能會由Raymond頂上，即係Raymond點都有職升。

我哋前日向林D9求證，係咪就快過檔特首辦，佢嘅答案係：「無人搵過我。」林D9呢個門面答案，我哋一早預咗，估唔到嘅係，我哋問完林D9之後，立法會尋日失驚無神有人主動報料，話商務及經濟事務局常秘蔡瑩璧會做特首辦主任，仲話政府好快有公布。不過，蔡瑩璧迅速回應，斷然否認紮職傳聞。我哋呢頭驚動咗林D9，嗰頭立法會突然有人四出放料，擾亂視聽，又會咁巧合嘅？