唉，真係聞者心酸、聽者流淚呀！可惜，就算佢點樣質問食物及衞生局局長周一嶽，要求佢對慘劇負責，但都係對牛彈琴㗎咋。周一嶽份人面皮出晒名厚，劑劑出事就扮到懶係難過痛心咁樣，但咁耐以來，又有冇正視過呢個社會潛在危機吖？

好似話發生咗今次慘劇之後，當局仲喺度死撐，話本港嘅政策係讓精神病人康復後融入社區，再配以定期覆診及藥物控制，但唔能夠百分之百保證唔再發生類似嘅個案。

其實計功夫茶話齋，一日都係醫管局資源錯配，搞到涉及精神病人嘅慘案無日無之，係百分之百醫管局靠害就真。

都唔好話唔驚，呢嗱，單計五月份，已經爆咗三宗類似事件。日前仲大劑，有個男人帶埋刀仔入議事堂自殘，話自己有精神病搵唔到人幫，喺求助無門下向立法會表達不滿。

冇辦法啦，據醫管局資料顯示，依家香港精神病患者多達十五萬四千多人，比四年前上升超過兩成三，點知同期精神科病床居然減少咗，由四千七百多張減至四千張，唔通呢四千張係兩層碌架床？咁都未夠奇呀，最奇嘅係精神病人多咗，入院治療人數反而不斷下降，呢條數真係唔識計喎。

鬼咩，近年話就話推行精神病人融入社區政策，其實所謂「融入社區」，不過係將啲未醫好嘅病人當包袱掟番畀社區之嘛。最慘係醫管局唔理，連社工跟進都不足，咁先至大件事。

舉個例吖，天水圍曾經發生一單精神病媽媽殺死子女並自殺嘅慘劇，死因庭揭發原來呢個女士入過醫院治療，仲係被列為具危險傾向，但唔知因乜事最後院方又畀佢出院，唔單止對病人唔負責任，仲喺社區埋落隨時會爆嘅炸彈。

最離譜嘅係，家陣公立醫院精神科醫生做到踢晒腳，每個醫生要睇五至六百名病人，病人睇醫生仲難過登天，一般至少要輪候二至三年，但就算輪到又點吖，原來平均睇症時間得嗰五、六分鐘，位都未坐暖就拜拜，斷錯症開錯藥真係話都冇咁易。

弊在呢個周一嶽明知問題嚴重，唔去增撥資源，反而搞咗個「藥物名冊」出嚟，為咗慳錢，專係開啲平藥畀病人。正所謂平嘢冇好，呢啲平藥有好多副作用，食到病人連醫生都唔想睇，病情變起上嚟就唔係講玩嘞。

精神病都係病嘅一種，係人都唔想有病，其實只要正視問題所在，對精神病患者畀多啲支援就得㗎啦。今次功夫茶都費事多講，不如聽吓死者父親點講：「如果政府再唔增加資源，下次唔知到邊個受害！」希望周一嶽收到，唔好繼續靠害！