唔少香港人都覺得做義工有意義，不過成日都話工作太忙抽唔出時間，其實只要有心，時間就會嚟搵你。尋日嘅「傑出義職人士揭幕禮及分享會」，就請嚟香港紅十字會醫護總監高永文醫生、無止橋慈善基金主席吳恩融教授等分享做義工嘅心得。高醫生即場介紹紅十字會喺四川德陽市一間康復及假肢中心嘅醫療工作，仲話一班義工承諾未來三至五年，平均一個月上一次四川幫手，佢當然唔例外啦。
問到做義工多年嘅高醫生有咩深刻感受？佢話見到四川災情嚴重，可謂天崩地裂，唔少災民唔係無咗對手，就係無咗對腳，換着自己都未必承受得到，但佢見災民依然好樂觀面對，令佢既感慨又佩服。
講到有咩方法令親友接受自己做義工，高醫生都話被考起，事關屋企人見佢咁辛苦，都想佢做少啲，但高醫生都提供咗一個有效方法，就係帶埋家人一齊，所以佢無論之前去助學長征定係其後去四川支援，佢都帶埋一對囝囝去，佢哋好受衝擊，返嚟都唔同咗。吳教授早前返內地為簡陋村落起橋，都帶埋十五歲嘅囝囝一齊去，佢講笑話囝囝返香港後更加珍惜打機嘅時間，仲識得自己走去義務教英文添。所以話，身教重於言教，大家不妨參考吓。