即將改名為「經濟動力」嘅立法會「3L」林健鋒、梁劉柔芬同梁君彥，打算後日（十六日）切燒豬搞開張酒會。自從3L去年十月同自由黨正式分手後，大家一直各行各路；不過再見亦是朋友，咁啱喺立法會停車場撞到自由黨副主席方剛同五散人之一嘅林大輝，同方剛講起3L個新竇就快開張，佢聽到之後，笑笑口送上四個字：「好！好！好！好！」佢仲好大方咁話，雖然未收到來自經濟動力嘅請帖，但對方請到的話，點敢唔去喎，話晒都係一場同事和黨友嘛！
一齊開完會嘅林大輝，口徑同方剛一致，都係話如果3L請佢，佢一定會去捧場。大輝同各方一向友好，佢又點會唔畀面捧場呢？
講開又講，由方剛做召集人嘅齊抗金融海嘯大聯盟早前搞咗個父親節活動，嘉賓之一、自稱成世未買過六合彩嘅立法會議員李華明，抽獎抽中張六合彩飛。估唔到肥仔明非常好運，張六合彩中咗三個字，有二十蚊獎金。