前財政司司長梁錦松早前講過，沙士比豬流感難搞好多，早兩日佢又現身中環，身為百仕通（Blackstone）大中華區主席嘅佢，啱啱去咗美國夏威夷公幹，佢話喺美國所見，當地人只會喺人多密集嘅地方先至戴口罩，喺人少嘅地方就冇人理，事關大家都覺得豬流感雖然傳染性高，但同一般流感一樣有藥醫，唔需要好似對抗沙士咁大陣仗。

佢又話好彩佢太太伏明霞持家有道，三個仔女停課都有大把活動，唔會搞到踢晒腳，嚟緊暑假佢仲會帶埋一家大細去旅行，似乎無畀港府同世衞嘅旅遊警告嚇親。

前馬會行政總裁黃至剛嘅外遊故事仲好笑，話說佢日前去咗美國芝加哥列席一個商務會議。為免感染豬流感，將病毒帶返香港，佢特別帶備咗幾個口罩以便喺坐飛機同開會時用，點知一上到機就發現自己係全機唯一一個人戴口罩，戴咗冇耐就自覺冇癮除咗。之後佢喺開會時戴口罩，情況亦同機上差唔多，期間仲有位外籍人士陰陰嘴笑咁對住佢扮咳，暗寸佢呢啲亞洲人對豬流感過分緊張，搞到佢面都黃埋，最後都係跟大隊不設防唔戴口罩，好彩返到嚟乜事都冇。

劉健儀乖仔自我隔離

不過返到嚟香港，佢都撐政府停課嘅決定，話香港人口稠密，加上經歷過沙士疫症，緊張啲都可以理解喎。

自由黨主席劉健儀亦同我哋講，佢囝囝早前由美國加州飛咗去紐約上個短期課程，事後好乖咁租咗間房自我隔離一個星期，以免不幸染病再傳染埋喺加州同住嘅公公婆婆，好彩最後都係虛驚一場。佢同黃至剛一樣，都話香港經歷過沙士衝擊，政府同市民緊張啲都係好正常，不過嚟緊暑假都係會照常飛去美國探親，無懼豬流感威脅；簡言之，豬流感繼續對抗，美國繼續去！