名導演許鞍華執導嘅《天水圍的日與夜》在今屆電影金像獎中奪得四項大獎，故事好寫實，賺人熱淚，齣戲就感動咗智經基金研究中心主席、醫管局主席胡定旭睇咗三次。肥胡為咗同「智經之友」會員分享呢齣好戲，特別搵老友許鞍華義助借出影片，在中環IFC Palace包場放影及舉行分享會，卓妮都去湊熱鬧，去年獲智經推薦入政府嘅教育局副局長陳維安仲同太太拍拖捧場，睇埋套戲至走，政壇新星葛珮帆、麥美娟等都有出席。
許鞍華尋日都有親自到場同大家分享。佢話開拍《天水圍的日與夜》只係一個意外，緣於○四年眼見天水圍一宗滅門慘劇，令佢衝動想拍齣反映社會現實嘅電影，可惜過程中搵投資者相當困難，試過有投資者撻訂放棄拍攝計劃，好彩佢自己沒有放棄，心血來潮從倉底搵番套中大新聞系學生投寄嘅劇本，改寫成今日嘅《天水圍的日與夜》。
許鞍華話，當初明知齣戲係無市場，就連首次喺電影節放映，佢都唔敢去睇，但估唔到齣戲反應熱烈。許鞍華有感而發話，拍電影有時好irrational（不理性），但咁樣往往才有驚喜！
卓妮