陳振彬倡游水殺菌

前亞視老闆邱德根和鄉議局主席劉皇發一樣兒孫滿堂，近排因為學校停課，兩人嘅大宅頓時變成孫兒嘅防疫隔離中心。卓妮尋日在沙田馬場遇到發叔和邱德根夫婦，小學幼稚園停課兩星期，發叔話佢間屯門大宅變得好熱鬧，八個孫仔孫女到齊晒，依家諗緊有乜暑期活動畀佢哋參加。邱德根就話諗活動諗到好頭痛，現階段盡量少外出，三個孫兒一日三餐喺屋企搞掂，因為自己煮飯可以衞生啲喎。

同樣為停課頭痛嘅仲有觀塘區議會主席陳振彬（Bunny），佢兩個囝囝焯晞和焯煦都要停課，但最弊係未考試，好擔心放假放到心散，太太每天都要幫兩個仔溫書。Bunny又話，小朋友成日屈喺屋企又唔得嘅，所以佢每朝都會帶兩個仔去海灘游水，一來強身健體，二來海水可以殺菌，有助對抗豬流感，佢希望疫情風險降低後，兩個仔考完試可以放個安樂暑假。

楊孫西湊孫講古仔

至於百仁基金副主席施榮忻，佢為咗抗疫都要愛女Victoria減少出街，因為擔心小孩子警覺性低，經常用手觸摸臉部，容易受到感染。為咗等愛女無咁悶，榮忻每朝返工前都會陪愛女去游水增進感情。不過，亦有名人家長覺得停課係件好事，全國政協委員楊孫西就話：「停課好吖，可以畀啲外孫多啲時間陪我，我又可以講故事畀佢哋聽，依家諗緊請老師回家教外孫彈鋼琴。」

卓妮