衞生署無端白事突然暫停幾項醫健服務，估計可能有六萬人受影響。其實，停還停吖，都唔好一刀切話停就停，搞到好多市民白行一趟，你話係咪擾民吖。有家長帶子女去到牙科診所至知暫停服務，至於幾時可以睇到醫生呢？連診所職員都唔清楚，叫家長聽電台廣播喎，真係畀佢哋吹脹！

呢班衞生官員一時一樣，一時急驚風一時慢郎中。記得豬流感啱啱打到嚟時，講到好似冇有怕咁款，功夫茶一早警告過，齋噴口水花又點可以控疫吖，豬流感遲早喺社區爆到七彩。

話口未完，已經應驗晒啦，當局「控疫」搞唔掂，衰咗就改口話要「緩疫」，三歲細路仔都呃唔到啦。單從呢次停課事件可以睇得出，佢哋完全冇經過周詳考慮及部署，做少少嘢都亂晒龍。

有專家指出，豬流感有專揀青壯年埋手嘅趨勢，本港嘅首宗本地集體感染喺邊度爆發？咪就喺中學生囉，既然小學要停課，因乜事一樣咁高危嘅中學又唔停埋課呢？

仲有，當局只係識得呼籲家長畀仔女留喺屋企，但冇從家長角度去諗吓，唔知道喺金融海嘯之下，好多父母手停口停，根本冇可能留喺屋企照顧仔女，結果停課令一下，搞到好多家長踢晒腳。

呢嗱，尋日停課首日之嘛，就有一位七歲女童被獨留家中，其父親因涉嫌疏忽照顧而被捕添。唉，有乜辦法吖，大人唔使返工搵食咩，呢啲咪就係政府嘅好帶挈咯。

仲有吖，迪士尼喺當局剛剛宣布停課之後，即刻出嚟乘機抽水，推出六月小童通行證，買一日小童門票價錢就可以全月任玩。停課嘅原意係希望學生少啲去人煙稠密嘅地方，減少互相感染嘅機會，點知迪士尼樂園反而為兒童大開方便之門，你話喇，喺咁嘅情況下，學校停課有乜嘢意義呢？

事實上，港府抗疫劑劑都係見步行步，為做騷而做騷，好似話之前整色整水搞咗個「全城清潔運動」，做完騷之後就關人個關。喂，一日乾淨、百日污糟有鬼用咩，後巷依然咁污糟邋遢，豬流感想唔喺社區爆發都唔得！

依家豬流感疫情真係唔講得笑，全球確診總人數近三萬宗，世衞已將流感警戒級別由現時嘅第五級提升到最高嘅第六級，形勢認真嚴峻！難為港府高官仲亂發訊息，自吹自擂話抗疫策略成功，要小市民維持正常嘅生活，又呼籲大家唔好恐慌，信嗰個死嗰個！

唉，見到食物及衞生局局長周一嶽成日吹水扮防疫，一係唔做嘢，一係矯枉過正，市民又點會唔恐慌吖。好彩香港人經過沙士之後，防疫意識比高官好好多，個個識得自求多福。