公開大學校董會尋日大執位，前港交所主席李業廣（Charles）卸任校董會主席一職，教育局局長孫明揚感謝Charles過去對大學卓越領導，在改良教學、學習及研究方面都取得顯著成績。有咁啱得咁蹺，我哋前日在中環遇到Charles，佢提前預告，話自己仲有幾份公職，但將會開始慢慢退下來，相信將來會無咁忙，真真正正享受退休生活。
不過，行政會議今年一月先至完成改組，有「股壇教父」綽號嘅Charles要再坐一會協助應付金融海嘯，當時又再冧莊；雖然行會無任期，但分分鐘要跟隨特首任期做多三年。不過Charles就畀「三年」呢個數字嚇驚：「唔好喇啩，我唔想霸住啲位，畀啲有才華嘅後生做吓啦！」Charles同「肥龍」許仕仁以前多次傳出離開行會，但結果又繼續留低，唔知幾時走得成呢？
正所謂「長命工夫長命做」，Charles今個暑期會同太太坐郵輪暢遊地中海歎吓世界。記得Charles在泰國擁有一間私人豪宅作度假之用，各地物業更不計其數，唔知佢會否多到唔記得自己究竟有幾多物業呢？Charles就話自己嘅物業不多，唔會好似啲富豪多物業到記唔晒喎！