本文重點
「３Ｌ」林健鋒（Jeffrey）、梁劉柔芬（Sophie）同梁君彥（Andrew），擇定良辰吉日，今月廿六日為聯合新竇口剪綵開檔營業，塊招牌叫「經濟動力」，象徵退出自由黨後自立門戶，最新消息，「３Ｌ」打算提早喺十六日搞開張酒會切燒豬，反映佢哋真係好心急以新形象示人。咁啱尋日政府宣布，委任Jeffrey做盛事基金評審委員會主席，由本月十五日生效，為期三年，Jeffrey都算雙喜臨門囉。
二月預算案預留一億元設立盛事基金，負責協助非牟利機構喺香港籌辦文化體育盛事，推動香港成為「亞洲盛事之都」，基金新鮮出爐，Jeffrey變做開荒牛，角色同佢有份創立嘅「經濟動力」好相似，而兩單嘢嘅開檔時間又接近，世事認真巧合！
生促局變世襲制？
同屬「３Ｌ」嘅工業總會立法會代表Andrew，公職方面亦有變動，政府尋日宣布，委任工總主席陳鎮仁接替佢，下月開始執掌生產力促進局。其實，Andrew擔任統領執掌生產力促進局已經六年半，因為金融海嘯，港府叫佢坐鎮多半年，依家新主席又嚟自工總，怕唔怕被人話世襲呢？Andrew話，政府揀人係睇能力，陳鎮仁的確為中小企做咗好多嘢，有咁嘅接班人，自己都好開心。Andrew咁撐陳鎮仁，好開心嗰個應該係陳鎮仁就真！