政府近期話要搞綠色經濟，周圍搵啲電動車嚟試，早排環境局局長邱騰華去完日本試車，尋日又到佢嘅頭馬環境局常任秘書長王倩儀出動，去深圳試吓部國產插電式雙模混合動力車F3DM。王倩儀尋日去深圳參與「2009綠色行動日暨深港清潔能源汽車推廣應用活動」，講明要同深圳政府一齊開始試用比亞迪架雙模混合動力車，佢仲身先士卒坐上部電動車兜咗陣風，佢試完之後大讚架車運行好暢順，仲好似拎手信咁，帶咗兩部返香港畀幾個部門輪流試行。
下個月開始，港府就會試用兩部比亞迪生產嘅插電式雙模混合動力車F3DM，兩架車會輪流喺環境局、環保署、機電工程署、運輸署、海關同漁護署輪流試用，收集到嘅資料就攞嚟同深圳方面交流吓。
呢架國產混合動力車售價人民幣十五萬元，平過日本出產嘅環保車一大截，製造商仲話可以用家用電源叉電，夠晒方便喎。係咪真係物有所值，就要試過至知。