唔少香港人都頭痛請唔到啱心水傭人，高靜芝尋日出席由婦女事務委員會策劃嘅公開大學「自在人生自學計劃」畢業禮後，講起呢個話題，順道同大家分享揀傭人秘訣。佢話唔介意傭人性格蠢蠢哋或者年紀大啲，最緊要係心地善良。

正所謂人心隔肚皮，單憑面試時傾幾句，好難判斷傭人係扮純情定係真善良，佢就會試探對方係咪虔誠教徒，如果係的話，多數唔壞得去邊喎。

揀啱工人之後，仲要不時派吓糖畀佢哋，高靜芝氹工人就有一手，每次去旅行預埋對方一份，衣櫃有乜舊衫都會慷慨送贈，所以身邊啲菲傭都唔願走，仲一做就十幾廿年。

其中一個幫手湊大佢個女嘅老工人，更成為家中貴賓，高靜芝每年都會請佢由菲國返港作客，咁長情嘅僱主你話去邊度搵呢？