「七一」將至怕激起民憤

豬流感來勢洶洶，牽動全城神經，喺高官眼中，嚟緊幾個月港府可唔可以短暫擺脫苦日子，可以話成也抗疫，敗也抗疫，所以瞓身去盡，誓要演好呢場抗疫大龍鳳。就算抗疫交白卷，護民無料到，表面工夫都要交足戲，費事激起民憤，火燒連環船，牽引出其他政治問題。

「七一」將至，港府已決定將所有具爭議性政策「打包」封箱，推遲出台，製造一個平靜的六月。

喺咁嘅大背景下，特區高官面對豬流感，更加如履薄冰，步步為營，求神拜佛唔好添煩添亂，孭上呢個罪名。

暑假將至，立法會休會在即，本來係特區高官放長假嘅黃金檔期，不但今年情況可能有變。旅遊事務專員方舜文尋日喺個場合上坦言想放假叉電，但疫情緊張，要睇政府最高層肯唔肯放人至得。即係話，佢哋班高官要做好心理準備，為疫情犧牲假期。

其他有份參與抗疫嘅局長，好似花名「每周一鑊」嘅衞生及食物局局長周一嶽、主管出入境政策嘅保安局局長李少光、拍板學校停課復課嘅教育局局長孫明揚，同埋睇實疫情對本港經濟影響嘅商務及經濟發展局局長劉吳惠蘭，全部口徑一致，透過新聞秘書回覆，短期內都無計劃放長假，除咗必要嘅公幹出差之外，唔會離開香港。

高官綑綁式返工，呢個暑假，下亞厘畢道肯定好熱鬧！

陳甘美華分三階段放假

政府工出名假期好，一場豬流感，高官有假唔敢放。不過，都有例外個案。憲報尋日刊登，民政事務局局長曾德成六月十五至廿四日休假十天，期間職務由副局長許曉暉署任；民政事務總署署長陳甘美華亦喺六月十五日至七月廿八日分三階段放假，避過抗疫高峰期，唔通署長怕咗豬流感？