全國政協常委陳永棋擔大旗嘅香港友好協會搞晚宴慶祝成立廿周年，嘉賓多到令人眼花繚亂，蔡老闆拖埋千金加怡及公子加讚到賀。卓妮捉佢講起股市，佢忍唔住話：「個市咁癲，見到都驚！」蔡老闆投資物業動輒以億元上落，何解會畀啲股票嚇親？佢分析市況話，玩具業首季定單跌咗兩、三成，近月話就話多番單，但數目只係「碎單」，換言之歐美經濟仍然凍過水，試問香港又點可能一枝獨秀？言下之意，即係話港股已經升到脫離基本因素，後市仲買唔買得過，大家自己諗嘞。

黃河清唔做大鱷點心

企埋一邊觀望股市嘅仲有人稱「太空鉗之父」嘅黃河清，前日佢同理大校長唐偉章現身捐款活動，卓妮本來想問人稱「理大秋官」嘅唐校長點睇市況，點知黃河清爭住答，仲以一派專家口脗分析，話全球經濟經歷金融海嘯後，等同一個啱啱施完手術嘅重傷病人，有乜可能咁快就紮紮跳？更令人嘖嘖稱奇嘅係，香港近月根本完全冇好消息出籠，喺短短幾個月間卻突然呈「Ｖ」形反彈，有啲離晒譜喎！為免成為大鱷「點心」，佢話要等股市調整到萬四點先入市，依家一於攬住現金唔放喎。

不過另一邊廂，亦有人堅持做股市大好友，做證券生意嘅全國政協委員張華豐認為，經濟最壞時期已經過去，嚟緊港股縱有調整，大方向依然係向好，真係信不信由你嘞！

卓妮