法官昨在庭上就龔如心為人向區燕玲查問，「有口供曾形容她為王太后，係咪代表佢鍾意甚麼都自己揸主意？」。惟區解釋，龔一定會先聽取所有人意見，分析後再做判斷，法官又問龔如心作決定後是否很難改變主意，區指「要視乎情況，若是生意上之決定就未必一定」。惟區又提及，若龔如心當初極度堅持反對掩飾病情時，眾人都不會違抗「聖旨」。

華懋集團董事梁榮江昨現身法庭，下周先讓筆迹專家作供。	獲法庭預留旁聽席位的男子，多次被記者追問是否為警務人員。	龔如心曾就委任華懋慈善基金理事一事給予指示。

為員工飯碗 與家翁打官司

區燕玲昨於庭外再點評小甜甜，指最深刻是老闆到病重時，仍然記得她最愛吃鮑魚，「最後一次食開年飯，大家一齊返公司食盆菜，佢猛叫我食鮑魚，因為記得我好鍾意食，佢自己都有食，但吞唔到。」

區又指，當年龔如心曾向她透露，與家翁王廷歆打官司，全為保住公司全體員工飯碗，「王太話佢自己食得幾多、使得幾多呢？只係怕官司萬一輸咗，會影響成班員工生計，後來佢就算知道自己有病，都捱住就係因為顧住班員工，咁你諗下佢點會捨得將自己個Baby拱手畀人？」

無可能將身家分給外姓人

區又說作為一個女人，無可能將身家分給外姓人，「將自己心血交畀一個人，即係畀埋佢太太、佢子女，作為女性感覺會點？無可能啦！」記者問她龔是否因為太易信人常被有心人騙財，她苦笑「唉﹗佢真係好好人、無機心，成日話大家都係人，無分大老闆、小老闆，成日只睇到人正面嘅嘢，用自己個心同人相處。」

當她回想為老闆慶祝最後一個生日的情景時，不禁雙目通紅「嗰日佢好辛苦，連吹蠟燭嘅力都無，佢好鍾意食Tiramisu（意大利芝士蛋糕），但最後佢都食唔到」。她說覺得老闆最厲害之處是很堅強，無論當年打官司時面對負面新聞抑或後來患癌，都不吭一聲，「佢無嗌過辛苦。」區又披露，曾應龔如心要求提供過自己的出生年月日給龔「睇下夾唔夾」。