高山道公園設高山劇場、四個網球場及一個足球場，因地點便捷，園內設施平日使用者眾，毗連高山劇場的網球場更深受網球發燒友歡迎，平日與假日的夜間時段幾乎全部爆滿。

獲悉網球場封閉在即，一眾網球愛好者近日每次碰頭均就閂場事件議論紛紛。	鄭小姐：依家話閂就閂，為咗搞個粵劇場地就搞到我哋冇地方打波，真係好唔合理喎！	蔡先生：呢度BOOK（預訂）場要成個月前親自落嚟搞，依家話封就封，問都冇問過我哋班用家，又冇貼通知，政府點可以咁做嘢？

晚晚爆滿 竟亂噏使用率低

經常偕友在上址切磋球技的黃小姐指出，日前訂場才赫然發現場地將於七月關閉，「一直都冇通告話會封場，問咗一輪，康文署竟然話網球場使用率低所以要閂，明明晚晚都爆晒場，要早成個月先訂到都叫使用率低？」

事實上，據康文署提供資料顯示，高山道公園網球場的使用率平均達六成，與該場使用率低之說大有出入。香港網球總會總經理Janet Hardisty亦稱，該會近年常在上址開辦青少年網球訓練班，至近日訂場時才獲悉場地將關閉，對康文署從未諮詢公眾大感失望，「近年網球愛好者不斷增加，但香港缺乏新建場地，致現有設施供不應求。康文署決定封閉高山網球場，我們擔心呢四個球場將會永遠消失！」

「康文署唔可以擺區議會上枱，成件事真係冇做過廣泛諮詢，咁多年嚟亦冇交代過喺邊度起番啲網球場！」當區區議員楊永杰指出，康文署曾以本港缺乏粵劇演出場地為由，建議擴建高山劇場，高山道公園的四個網球場因而被徵用，事件曾在區議會上討論，但被徵用網球場的重置問題，康文署至今未有交代。楊認為附近現有網球場未能滿足需求，要求康文署盡快落實重置網球場時間表，向用家交代。

拖逾三年 議員斥嚴重失職

康文署發言人未有正面回應缺乏諮詢的指摘，只重申新翼工程籌備至今，曾多次向九龍城區議會及粵劇發展諮詢委員會諮詢及報告進度，至於同區另闢用地補償網球場設施之可行性，則仍與有關政府部門在研究中。

對於高山道公園網球場落實封閉逾三年，康文署仍未另闢用地重置設施一事，立法會民政事務委員會委員張國柱直指該署嚴重失職，「明明有數據顯示個場有人用，點解康文署研究咗咁耐都冇結果？依家仲研究緊，到底仲要研究到幾時？」

記者 吳琰玲