打網球又真係幾爽㗎，如果你好似舒拉寶娃咁，每揮一次拍就「呀」一聲叫咗出嚟，包保你身心舒泰，即使喺金融海嘯裏面吃盡苦頭，都可以將一腔鬱氣傾情發洩。假如你識得將周達明個大名寫喺網球上面，一下一下狠狠抽打，更加過癮，直情有鵝頸橋打小人嘅暢快感覺。

點解要將康文署署長周達明當小人咁打呢？哦，係咁嘅，周署長忽然之間成為網球發燒友嘅公敵，康文署居然問都唔問就一意孤行消滅高山道公園四個網球場！

係呀，消滅四個網球場呀，七月就會落閘放狗，土瓜灣舒拉寶娃想同馬頭圍費達拿切磋球技咩？咁就要跨區另覓場地咯，即係要同其他網球發燒友爭崩頭。

康文署嘅解釋簡直係擘大眼講大話，佢哋話喎，由於使用率低，所以要關閉四個網球場，用嚟擴建高山劇場，為粵劇發燒友提供場地。

使用率低？根據波友嘅親身經驗，訂場要預早一個月，夜間時段幾乎全場爆滿，如果咁都叫做使用率低，功夫茶建議周達明轉做京官，誓神劈願宣布：四川地震災區冇豆腐渣，乜渣都冇！

講到尾，原來係為咗滿足粵劇發燒友，所以犧牲網球發燒友。

功夫茶絕對唔反對政府為粵劇團體提供表演場地，而且大力支持添，問題係，你擴建高山劇場之餘，可唔可以擇地重建四個網球場呀？你完全冇補償方案，對網球發燒友好唔公平啫，搞到人哋變成流離失所嘅「網球難民」。

話時話，特區政府施政作風確係騎呢古怪，古色古香嘅北九龍裁判法院本來係可以為粵劇團體提供表演場地嘅，人哋八和會館鼓其如簧之舌做足游說工夫，吖，政府一嘢將個場交畀外國唔知乜嘢藝術設計學院喎。呢一個決定，搞到八和會館汪明荃梨花帶雨。

即係咁，粵劇發燒友其實都係受害者，由於政府思覺失調，八和會館做咗流離失所嘅「粵劇難民」。然後呢，骨牌效應嘞，為咗安撫「粵劇難民」，政府御准鵲巢鳩佔，土瓜灣舒拉寶娃以及馬頭圍費達拿做咗「網球難民」。

所以話啫，政府一手炮製出嚟嘅「網球難民」，以後如果搵到場地打波，真係有必要將周達明個大名寫喺網球上面，一下一下狠狠抽打。

講到呢度，功夫茶有一個建議，安撫「網球難民」其實都好簡單，開放禮賓府畀佢哋入去打波囉！