豬流感入侵社區，小學幼稚園停課，學生好似提早放暑假，香港迪士尼樂園即搶閘推「任玩證」，諗住幫佢哋解悶兼搵番筆，點知畀政府詐型，鬼咁尷尬。咁啱尋日佢哋嘅夏日特備節目搶先開鑼，同旅客大玩互動，開幕禮上行政總裁金民豪拍住今年活動主角外星生物「史迪仔」、加埋近期熱爆港台兩地嘅歌星主持人庾澄慶，着晒夏威夷恤、坐住吉普車喺樂園內嘅美國小鎮大街出場，夠晒搶鏡！
迪士尼方面話，今次搵庾澄慶做節目代言人，貪佢夠鬼馬、搞笑兼有活力，同史迪仔形象好襯。為省靚招牌，金民豪仲會首次粉墨登場參與拍攝宣傳短片，短片屆時會喺網站、戶外廣告電視及巴士上播放，片中嘅佢飾演上班一族，喺渡輪上豎起拇指及尾指呢個象徵「Hang Loose」嘅手勢，大跳「史迪仔626熱舞」。金民豪話呢個手勢喺夏威夷好流行，表示「你好」、「很高興見到你」，更有「鬆一鬆」嘅意思。