曾醫生前日出嚟公布最新疫情，大家問佢係咪同患者住喺同一座、住得近唔近，佢當場面有難色，唔肯即時揭盅，只係着記者去瀏覽中心網頁睇番。

咁又係，若然曾浩輝話同患者都係住第四十三座，肯定嚇到記者們雞飛狗走，個記者會睇怕都開唔成；佢出得嚟開記招，大家都應該唔使擔心嘅！

講開豬流感恐慌，醫院管理局主席胡定旭都有份，但佢最驚嘅並唔係中招，而係需要隔離。聞說肥胡半個多月前去北京公幹，喺飛機上遇到一名同坐商務客艙嘅外國人，位外國人迎面而來點頭同佢打招呼，點知冷不防打個噴嚏，佢即刻向機組人員要求調位，同嗰名旅客調離至少三行座位嘅距離，仲要機組人員改番電腦紀錄。

肥胡咁緊張，都係擔心一旦位外國乘客中招，佢要被隔離，醫管局就少咗位抗疫指揮。不過依家豬流感擴散社區，睇怕隔離都慳番。