旅遊業係香港四大經濟支柱之一，尋日香港有個國際旅遊展，好多國家嘅官方旅遊機構、航空公司同旅行社都有參展，場面墟冚，奇在代表港府商務及經濟發展局擔任主禮嘉賓嘅，係副局長蘇錦樑（Greg），唔係大當家劉吳惠蘭，唔通港府暗中調整旅遊業嘅戰略？
非也！原來劉太尋日臨時要去出席港府對抗豬流感嘅督導委員會會議，所以咪叫阿Greg做替工囉。阿Greg致完辭，巡埋參展攤位至走，佢顯得小心翼翼，見到推銷當地旅遊嘅各國美女都好避忌，冇主動去握手。問佢最鍾意邊個攤位？佢話間間都好，各有特色，都係一啲非常穩陣嘅答案，反而佢透露嚟緊會放假旅遊，更加引起大家興趣。
阿Greg去年六月上任至今已有一年，最長嗰次假期都係得三日，阿Greg尋日所講嘅假期，我哋八到，將會由下個月十日放到廿五日，乜嘢咁重要、令佢破戒請長假呢？實情係阿Greg三個仔女中，排行中間、喺倫敦讀醫嘅兒子下個月戴四方帽，阿Greg咪請假飛去觀禮囉，仲計劃請囝囝上郵輪旅行慶祝。按香港規例，外地醫科畢業生要喺外地實習兩年，先至可以回港考牌執業，唔知係咪咁，阿Greg特別記掛呢個仔呢？