江蘇省民企無錫嘉創科技有限公司捐贈一百萬元人民幣畀理工大學工業中心，人稱「理大秋官」嘅新任理大校長唐偉章，尋日代表理大接受支票。既然有朋自北方來，身為主人家嘅唐校長自然好識做，即時「轉台」用「煲冬瓜」致謝辭。
唐校長過去長年住喺美國，開口埋口都係「雞腸」，所以佢選擇用普通話致辭時，同事都笑住問佢有冇困難，佢就好幽默咁講：「我冇困難，係你哋有困難！」因為佢擔心自己發音唔準，大家會聽得好辛苦喎。其實唐校長咁講真係太謙喇，皆因我哋留意到佢好用心準備份講稿，喺每一個字上面都寫上普通話拼音，所以佢致辭時雖然頻頻瞄貓紙，但整體而言都講得幾流暢，而且咬字仲好清晰添。
豬流感（Ｈ１Ｎ１甲型流感）出現本土個案，雖然依家淨係幼稚園、小學同特殊學校停課，不過唐校長都唔敢怠慢，佢話學校已經成立專責小組密切留意同制訂應對豬流感對策，至於會唔會停課就要視乎疫情而定。唐校長話好彩理大已經考晒試，就算要停課，都唔會搞到全校師生手忙腳亂。