英姐喺意外中跌至盆骨爆裂，本身已經好傷，其實佢荷包嘅傷勢亦都唔輕，各項醫藥費加加埋埋高達十七萬元。如果係立法會秘書處職員喺工作期間跌傷，仲可以申領勞保賠償，但議員喺立法會跌傷，反而冇得賠，皆因議員喺法律上唔算係僱員，根本冇僱主可以代佢哋購買勞保，最多只可以申領每年二萬幾蚊嘅議員實報實銷醫療津貼。

最慘係本身代表勞工界、向來都好重視職業安全同勞保問題嘅英姐，竟然老貓燒鬚冇幫自己買醫療保險，要自掏荷包畀番接近十五萬元差額，對來自基層嘅英姐都咪話唔傷。

行會區會同受害

大象哥喺上屆立法會亦因為睡眠窒息症動過手術，當時連醫療津貼都未有，自然好同情英姐，於是自告奮勇去信行管會要求討論事件，點知一問就揭發更多問題。原來依家各名非官守行會成員及十八區區議員，都與立法會議員同病相憐，冇資格亦冇資源購買勞保；即使佢哋因工喺政府物業內跌傷，都好可能一毫子都冇得賠。

須知唔少現任非官守行會成員都已經年過六十，政府總部行會條專用樓梯又有番咁上下斜，一個唔小心差錯腳跌親，真係冇眼睇。所以，據聞行政署接獲有關查詢後，已立即向律政司尋求法律意見，稍後會同行管會匯報結果，睇吓有冇方法可以堵塞呢個漏洞。換言之，大象哥一次過幫晒所有行會、立法會同區議會議員出頭，認真功德無量！