豬流感（Ｈ１Ｎ１甲型流感）終於喺社區爆發，全港小學同幼稚園停課兩周，全城高度戒備。不過，政界嘅觸覺似乎出現滯後現象，大兒子讀緊小二嘅港區全國人大代表陳智思（Bernard），收唔到停課消息，房協主席楊家聲更加懶理來勢洶洶嘅疫情，仲自嘲豬流感對老人家殺傷力唔大添。都係做生意嘅最明小心駛得萬年船嘅道理，啱啱接咗帥印統領超過九千名員工嘅恒生「一姐」梁高美懿透露，恒生一早入定大量口罩同特敏福，萬一員工中招都無有怕！
陳智思唔知囝囝停課
小學停課兩星期，係兩個小朋友父親嘅Bernard，可以話首當其衝，讀緊小學二年級嘅大兒子生活難免被打亂。卓妮尋日下晝兩點幾喺中環遇見Bernard出席完每月嘅「鳳凰午宴」出嚟，當時政府已經公布停學消息幾個鐘頭，但係Bernard一頭霧水，反問卓妮：「乜唔係只係聖保祿小學咩？」當Bernard知道消息，不慌不忙，滋油淡定咁話，好彩屋企有太太呢個大監工，囝囝停課，咪喺屋企讀書溫習囉，只係上堂地點同「老師」改咗啫。成功男人嘅背後，總有個女人打點一切，果然無錯。
另一個完全不感受到豬流感威脅嘅人係房協主席楊家聲，佢都係「鳳凰午宴」嘅嘉賓。
楊家聲恃老無懼豬疫
楊家聲話個女外嫁英國，佢早兩個星期先至去英國探過個孫，健康活潑，百毒不侵，身為祖父母，佢同老婆都好放心。至於佢更加唔驚啦：「豬流感對老人家嘅殺傷力唔大！」
豬流感影響小學運作，疫情幾時蔓延到大專院校無人知，卓妮尋日喺香港會又撞到行政會議成員、教育學院校長張炳良話，教院嘅課程早喺四月底完晒，學生過埋暑假至返學，○三年沙士時教院學生無受影響，相信今次一樣可以大步檻過咁話。
政界對豬流感咁冷靜，有啲令卓妮跌眼鏡；相比之下，商界就貼近民情得多。恒生副董事長兼行政總裁梁高美懿尋日都有赴「鳳凰午宴」，吸取沙士經驗，佢話銀行一早就豬流感喺社區擴散制訂對策，早早買晒口罩同特敏福看門口，分量足夠分畀員工抗疫，果然係未雨綢繆。不過，佢補番句話：「我個人梗係希望完全用唔着呢啲嘢啦！」呢一句，認真啱聽，講多幾次，相信恒生員工都唔會嫌佢煩。
卓妮