劉遵義○四年入主中大，五年嚟鬧出唔少風波，被中大學生冠以「膠樽義」嘅花名，尋日問劉校長點睇個別號，佢不以為然，笑笑口話：「尊重言論自由，咪由佢改囉！」被人改花名，咪當另類宣傳囉。不過，身為國際知名經濟學者，睇錯香港經濟走勢，呢個污點一定唔可以上身。尋日佢出席港區獅子會論壇，發表演講，繼續堅持香港經濟年中復甦嘅論調。

劉遵義篇演辭由中國講起，引用大量數據，力證金融海嘯下中國風光獨好，今年「保八」應可達標，香港從中受惠，港府上月公布嘅第一季生產總值按年比較負增長百分之七點八，只係滯後數字，第二季經濟係負數，佢估計跌幅收窄，第三、四季出現正數，全年埋單計數只會輕微負增長百分之一。

勸股民咪貪勝不知輸

劉遵義眼中嘅香港，簡直係金融海嘯下一個硬膠樽，經得起跌盪碰撞，亦變相摑咗鬍鬚曾一巴。上個月鬍鬚曾罕有地親自掛帥，公布第一季經濟數據，宣布香港經濟出現自九八年金融風暴以來最大衰退，又將全年經濟預測大幅修訂至收縮百分之五點五至六點五。言猶在耳，身兼經機會成員嘅劉遵義，卻以專家姿態話，全年相信只有負百分之一至真。雖然佢事後話係採用季節性調整計法，同港府略有不同，但佢公然同鬍鬚曾唱對台，就係改變不了嘅事實。

經濟前景未明，樓、股最近逆市向好，劉遵義順便提醒散戶，呢啲係熱錢作怪，炒家賺到錢就會撤資。佢引述一名美國投資者嘅贏錢座右銘：「I always sell too early！」似乎叫大家咪貪勝不知輸，咁依家係咪股民出貨時機呀？劉遵義就叫大家自己諗。其實，劉遵義罕有發表公開演講，唔通佢想喺「七一」前唱好經濟，安撫一班可能因經濟差而上街嘅市民，為特區政府卸力？