美國消費市場萎縮，本港好多中小企面對定單減少叫苦連天，幾經辛苦才成功爭取政府提高信貸保證額，暫解燃眉之急。「造紙大王」理文造紙主席李運強上周日入馬場時都大嘆生意難做，佢話睇依家咁嘅時勢，經濟起碼要兩至三年才能復甦，好彩其公司嘅紙品定單逐步回升；如果業務持續理想，相信股價在十八至二十個月後有機會升一倍，重上二十蚊水平。至於係咪一如佢所講，咁就真係要到時至知喇！
金融海嘯下，理文造紙股價由去年初嘅三十幾蚊跌到落幾蚊，近排個市暴升，先升番上九蚊邊緣，李運強話已經算係好番好多。股市出現回春迹象，有富豪預測年尾會升到二萬點，係咪意味現時入市仲有得執呢？李運強就預測，到年尾升到二萬點時，會急跌三千點都未定，低位買入未必會蝕入肉，但高追就可能會有損失，所以佢呼籲小股民入市要切記小心！