早幾日我哋寫過香港總商會嘅訪京行程，提到早前喺總商會理事會改選中成為輸家嘅前自由黨主席田北俊，冇跟大隊一齊坐飛機上京，更有指部分理事喺改選中冇投票畀田少，令彼此嫌隙更深。不過佢嘅前黨友總商會立法會代表林健鋒（Jeffrey）就否認田少咁做係有特別含意，強調除咗田少之外仲有其他人冇跟機，之後出席貿促會晚宴時大家亦有講有笑。
尋日喺中環撞到另一有隨團訪京嘅總商會理事兼前自由黨成員李大壯，佢一方面話唔覺得總商會同自由黨嘅關係好僵，仲自爆佢都有喺改選中投票畀田少，但另一方面佢又力撐總商會主席包立賢出信同自由黨劃清界線，強調商會唔應該同個別政黨關係過分親密。問佢係咪埋咗由前自由黨成員組成嘅「3L」堆，同佢哋組成「4L」，李大壯就澄清，雖然大家嘅姓氏都係Ｌ字頭，但佢就唔係傳聞中嘅第四條Ｌ，叫大家唔好誤會。
李大壯尋日又着咗佢嘅招牌唐裝衫，仲要係藍色底撞橙色袖，喺成街都係黑色西裝嘅中區顯得十分搶眼。李大壯自爆佢之所以鍾情唐裝，皆因自己懶唔鍾意打呔，着唐裝就冇呢個煩惱，無論係着住開會或者去宴會都咁得體，各位中區懶人不妨參考吓。